Rakip Abdylit të akuzuarit për shtytje në terrorizëm, i ashpërsohet dënimi

r_1507532683-7590066Të riut nga rrethina e Opojës Rakip Abdylit i është rritur dënimi nga 10 muaj në 1 vjet e 6 muaj burgim.

Ky është vendimi që ka marrë Gjykata e Apelit.

E arsyetimi i kësaj gjykate për rritjen e dënimit është shumë i qartë, raporton Gazeta Express.

Gjykata e Apelit gjeti se edhe pse i akuzuari e ka pranuar fajësinë, ka shprehur pendimin për veprën e kryer, më parë nuk ka qenë i gjykuar, është mbajtës i familjes dhe me gjendjen të vështirë ekonomike, mënyra e kryerjes së veprës penale dhe përsëritja e veprimeve, derisa është zbuluar nga policia, tregon vendosmërinë e tij për kryerjen e kësaj vepre. Pastaj, vendi dhe rrethanat nën të cilat është kryer, janë të natyrës të atillë që paraqesin intensitet të rrezikshmërisë shoqërore dhe shkallën e përgjegjësisë penale të të akuzuarit më të lartë, ndaj të cilit me një dënim aq të butë nuk mund të arrihet qëllimi i dënimit.

Sipas Prokurorisë Speciale, Rakip Abdyli, dyshohet për veprën penale shtytje për terrorizëm duke bërë thirrje përmes rrjeteve sociale Facebook dhe Youtube për sulm ndaj Qeverisë së Kosovës dhe ambasadave të huaja në Kosovë.

“Prokuroria konsideron se ekziston dyshimi i bazuar se i pandehuri Rakip Abdyli, duke filluar nga koha ende e pavërtetuar, në mënyra të ndryshme vazhdimisht ka postuar mesazhe kërcënuese për publikun, ashtu që në Facebook përmes profilit të tij me emrin Rakip Abdyli, si dhe në Youtube në faqen “Nasheed” ka postuar video incizime në të cilat të gjithë myslimanëve u bëhet thirrja që në emër të Xhihadit të kryejnë sulme kundër Qeverisë së Kosovës dhe Ambasadave të huaja në Kosovë dhe paralajmërohet ardhja e Hilafetit, si në incizimin me titull “Në tokën e shqiponjave do të vijë Hilafeti”, tha prokuroria e Prokurorisë Speciale të Kosovës, Merita Bina Rugova, gjatë seancës së procedurës paraprake.

Sipas Prokurores Bina-Rugova në përmbajtjen bëhej thirrje për sulme individuale dhe grupore ndaj udhëheqësve të vendit.

“Me ketë përmbajtje: Do vijë Hilafeti me përzënien e hienave, do vijë bereqeti, ngrihuni vllazni, ngrihuni o myslimanë bëni xhihad shpëtojeni këtë vatan, bëni sulme vetjake apo në grupe e dhelprave dinake frikën me jau futë. Sulme Istish hadie apo kallashnikov nga rruga selefie t’i mos u largo, dridhjani tokë qafirave, vrisni tagutat hapni rrugë të mirave Sheriatit, shijojani frutat bëhuni emir të vendit tuaj, mos e leni në errësirë nën udhëheqjen e huaj, ata nuk ju a duan të mirën. Drogë, bixhoz e zina jau kanë lanë errësirën, s’ju lënë ju dritë me pa. Kapni armët e sulmoni qeveri e ambasada vendin nga të këqijtë, çlironi nga udhëheqësit ma katolik se Papa”, tha ajo.

“Këto veprime janë bërë me qëllim të kryerjes së ndonjë akti terrorist me rrezik serioz”, tha prokuroria.

“Këtë e ka bërë me qëllim që të shtyjë kryerjen e aktit terrorist duke shkaktuar rrezik serioz që veprat të tilla edhe të kryhen. Me ketë i pandehuri kishte për të kryer veprën penale shtytja për kryerjen e veprave terroriste nga neni 141 të Kodit Penal të Republikës së Kosovës”, tha ajo.

Po ashtu, prokurorja tha së janë gjetur prova të mjaftueshme me të cilat vërtetohet se i dyshuari me vendlindje në komunën e Dragashit dhe vendbanim në Pejë, ka dashur ta kryejë këtë vepër penale.

“Ekzistojnë prova të mjaftueshme me të cilat vërtetohen ekzistimi i dyshimit të bazuar se i pandehuri e ka kryer këtë vepër penale. Aktvendimit mbi fillimin e hetimeve i është bashkangjitur një CD në të cilën gjenden postimet e përshkuara në dispozitivin e aktvendimit mbi fillimin e hetimeve. Në ndërkohë pas kryerjes së kontrollit në shtëpinë e të pandehurit janë gjetur edhe dorëshkrimet e tij me përmbajtjen identike të përshkuar me lartë”, tha prokuroria e Prokurorisë Speciale të Kosovës.

Rakip Avdyli i lindur me vitin 1991, sipas Prokurorisë në deklaratën e tij në Polici të Kosovës ka deklaruar së është përkrahës i organizatës terroriste ISIS.

“Po ashtu, konsiderojmë se të gjitha faktet dhe elementet e veprës penale shtytjet për kryerjen e veprave terroriste gati që nuk janë kontestuese fare meqenëse i pandehuri në deklaratën e tij e ka vërtetuar orientimin e tij militarist radikal islamit dhe përkrahjen e tij për shtetin islamik dhe organizatën terroriste ISIS. Nga të gjitha këto arsye, konsiderojmë se pa mëdyshje është vërtetuar ekzistimi i bazuar se i njëjti e ka kryer veprën penale për të cilën kanë filluar hetimet. Po ashtu konsiderojmë se në rastin konkret janë të përmbushura të gjitha kushtet për caktimin e paraburgimit kundër të njëjtit”, tha prokurorja Bina-Rugova.

I dyshuari për shtytje për kryerjen e veprës penale terrorizëm ka deklaruar në polici se ka dëshirë t’i bashkohet organizatës ISIS në shtetin e Sirisë.

“I pandehuri Rakip Abdyli është shumë i radikalizuar dhe sipas raportit të policisë i njëjti madje ka shprehur dëshirën që të shkojë t’i bashkëngjitet organizatës ISIS në Siri. Nga kjo arsye konsiderojmë se është i plotësuar kushti (për paraburgim) sepse është e bazuar frika se nëse i njëjti mbetet në liri do përpiqet që të arratiset”, tha ajo.

Vetë i pandehuri, Rakip Abdyli, i cili u arrestua sot në orët e mëngjesit, në deklarimin e tij në gjykatë tha se është penduar.

“Po jam penduar për veprimet e mia”, tha i dyshuari.

Kurse, Shaban Shala, avokat i angazhuar sipas detyrës zyrtare për ta mbrojtur të dyshuarin, tha se e kundërshton kërkesën për caktimin e paraburgimit ndaj të mbrojturit të tij.

“Duke u mbështetur në disa pjesë të deklaratës të mbrojturit tim në polici dhe atë nga shkaku se nuk është vërtetuar ende se i njëjtit ka lidhje me ndonjë grup radikal apo terrorist, ndërsa veprimet për të cilat i njëjti i ka kryer, ka deklaruar se ka pasur për qëllim që të mundohet të gjejë një mënyrë ta shpëtojë një femër kosovare e cila gjendet me djalë në Siri dhe ta gjejë mundësinë që të njëjtën ta tërheqë në Kosovë. Sipas kësaj, kjo ka qenë përpjekja e të njëjtit që i ka kryer këto veprime”, tha avokati Shala.

 

Postime te ngjajshme